За релативно брзо време успеавте да станете препознатлив бренд на македонскиот пазар. Како и кога започна приказната на Gley.tv и на што се должи досегашниот успех?

Gley е првата македонска национална SVoD платформа која на едно место ги нуди најдобрите домашни и регионални серии и филмови, како и европски и светски хитови. Неизбежен дел од нашата платформа е и детската содржина која во целост е преведена или синхронизирана на македонски и албански јазик.

Идејата за Gley се роди во време кога како потреба на еволуцијата на начинот на следење на содржина кај гледачите, напуштање на линераниот начин (телевизија) и користење на најразлични стриминг платформи (YouTube). Во светот и регионално веќе постојат пандани на Gley, но на нашиот пазар ние сме првите кои масовно го доближивме стримнгот преку интернет со моделот на месечна претплата до пошироките маси.

Недостигот на пазарот кај нас се однесуваше на 2 моменти. Едниот е воопшто немање на платформа од ваков тип која пред се ќе се фокусира на домашната содржина, додека вториот е детската содржина. За жал поголемиот дел од содржината која ја „конзумираат“ децата не е на нивниот мајчин јазик, со што се соочуваме со генерации кои не го говорат мајчиниот јазик правилно бидејќи постојано се изложени на англискиот јазик.

Ние се обидуваме да дадеме решение за овие два недостига на пазарот со што на едно место ќе претстави разнолика програма, целосно преведена на македонски и албански јазик, детска содржина на мајчин јазик преку синхронизација и секако сето тоа да може да го следат преку интернет без реклами.

Платформата е достапна во целиот свет. Со овозможен пристап преку веб пребарувач на компјутер, посебните апликации за iOS и Android мобилни телефони и таблети, и smart TV. Содржината кој е достапна во различни региони варира, земајќи ги предвид правата за емитување, но постојано работиме колку што е можно поголем дел да биде достапен за што е можно поширока публика.

За функционалноста на платформата секојдневно се грижат 10 вработени и бројни надворешни соработници, секој специјалист во своето поле на работа.

Новитет кој го донесовте на македонскиот пазар е subscription based модел на плаќање кој долго време постои на светскиот пазар. Колку вкупно претплатници до сега го имаат употребено овој метод на плаќање, колку е добро прифатен кај нас и дали е тешко да се имплементира?

Моделот на плаќање со претплата за услуги во светски рамки веќе е доста познат и разработен. И на нашиот пазар корисниците се запознаени со него. Во поголем дел немавме проблем со имплементацијата и комуникацијата за начинот на плаќање. Она со што се соочивме е дека можеби го потценивме процентот на населението кој е запознаен со плаќање преку интернет, како и довербата за оставање на податоци од своите платежни картички. Затоа се одлучивме малку повеќе да се посветиме и на едукација на нашите претплатници за безбедноста на интернет плаќањата. За среќа како партнер во ова ја пронајдовме Асоцијацијата за е-трговија на Македонија.

Кога би бирале една тимска победа која го издвојува Gley.tv од останатите, која би била тоа?

Не би можел да издвојам едена тимска победа. Сметам дека и покрај успесите кои што ги имаме се уште „војуваме“. Само можам да кажам дека сум горд на тимот кој безрезервно и верно работи за остварување на целите на Gley, а тоа е доближување на содржина на еден модерен и едноставен начин кон најшироката публика, како и нашето учество во јакнењето и развивањето на домашната продукција.

Какво е чувството да сте дел од е-comm светот? Колку на Gley.tv влијаат развојот на технологиите, динамиката на трендовите и менувањето на навиките на потрошувачите и како ја замислувате е-трговијата во иднина?

Gley како дигитална платформа е неделива од светот на е-трговијата и земајќи предвид дека се работи за технолошка иновација, прилагодувањето на навиките на потрошувачите се наш приоритет. Секако целта на секоја технолошка компанија е да ги креира навиките на потрошувачите, не само да ги следи. Сметаме дека ние сме дел од двигателите за развојот на е-трговијата во земјата, која иако од година во година зема се поголем замав сеуште има простор за нејзино унапредување.